59

ساہیوال: معاشرے میں باہمی یگانگت اور بھائی چارے کو فروغ دیا جائے- اعجاز عالم آگسٹین صوبائی وزیر

ساہیوال(خصوصی رپورٹ) صوبائی وزیر اقلیتی امور و انسانی حقوق اعجاز عالم آگسٹین نے کہا ہے کہ حضرت عیسی دنیا میں محبت اور امن کا پیغام لے کر آئے اور ان کی تعلیمات ہم سے تقاضا کرتی ہیں کہ معاشرے میں باہمی یگانگت اور بھائی چارے کو فروغ دیا جائے –

انہوں نے مذید کہا کہ پنجاب میں تمام مسیحی اپنے مکمل حقوق کے ساتھ ملکی ترقی میں اہم کردار ادا کر رہے ہیں اور بزدار حکومت ان کے مسائل حل کرنے کیلئے سنجیدہ اقدامات اٹھا رہی ہے جن میں مسیحی آبادیوں میں ضروری شہری سہولیات کی فراہمی،چرچز کی مرمت و بحالی اور ملازمتوں میں کوٹے پر عملدر آمد شامل ہے -وہ یہاں میٹرو پولیٹن کارپوریشن میں کرسمس کیک کاٹنے کی خصوصی تقریب سے خطاب کر رہے تھے.

تقریب میں ڈپٹی کمشنر بابر بشیر،پی ایچ اے کے چیئر مین چوہدری علی شکور،سابق ناظم شکیل احمدنیازی،شیخ اعجاز احمد رضا،الفرڈ گل،ڈاکٹر ظہیرہ سلیم اور ساجد منو کے علاوہ مسیحی ملازمین اور برادری نے بڑی تعداد میں شرکت کی -تقریب میں میٹروپولیٹن کارپوریشن کے ملازمین کے حقوق کے تحفظ کے لئے بنائی گئی یونین کے عہدیداران کی حلف برداری بھی ہوئی – صوبائی وزیر نے اپنے خطاب میں کارپوریشن کے مسیحی ملازمین پر زوردیا کہ وہ ملکی ترقی میں اپنا بھر پور کردار ادا کریں اور شہریوں کو بہتر سروسز کی فراہمی میں اپنا اہم حصہ ڈالیں –

انہوں نے کہا کہ پنجاب حکومت نے کرسمس کے موقع پر مسیحی ملازمین کو دسمبر کی تنخواہوں کی پہلے ادائیگی کے احکامات جاری کر دیئے ہیں تا کہ صوبہ بھر کے مسیحی ملازمین کرسمس کی خوشیوں میں شریک ہو سکیں – تقریب سے خطاب کرتے ہوئے ڈپٹی کمشنر بابر بشیر نے بتایا کہ ضلع ساہیوال میں مسیحی آبادیوں میں ضروری سہولیات کی فراہمی کے جامع پروگرا م پر عمل ہو رہا ہے اور مسیحی افراد کو در پیش مسائل بھی ترجیحی بنیادوں پر حل کئے جا رہے ہیں -تقریب کے اختتام پر کرسمس کیک بھی کاٹا گیا –

اس خبر پر اپنی رائے کا اظہار کریں

اپنا تبصرہ بھیجیں